Наврӯз – мероси фарҳангии беназир ва пайванди наслҳо

Ҷашни фархундаи Наврӯз муборак бошад!

Наврӯз на танҳо як ҷашни оддӣ, балки шиносномаи миллати мост, ки решаҳои амиқи таърихӣ ва фарҳангии худро нигоҳ доштааст. Ин ҷашн аз замонҳои қадим то имрӯз ҳамчун рамзи бедории табиат, оғози зиндагии нав ва ҳамдигарфаҳмии мардумон таҷлил мешавад.

Наврӯз – илмитарин, бузургтарин, мардумитарин ва табиитарин ҷашнест дар дунё, ки ниёгони мо бунён гузоштанд. Он бо ҳисоби дақиқи астрономӣ ва расму оинҳои худ беҳамтост. Ин ҷашн ҳамоҳангии инсону кайҳон ва замину осмонро дар худ гунҷонда, дар тадовуми умри дарозу пурифтихори хеш бар ҳама тангногузориҳои сиёсиву идеолоҷиву мазҳабӣ пирӯз шуда, ба унвони арзишмандтарин мероси тамаддунӣ ҷойгоҳи вижае дар ваҳдати инсонҳову кишварҳо дорад.

Имрӯз Наврӯз на танҳо ҷашни миллии мост, балки иди байналмилалӣ гаштааст. Он миллионҳо одамонро аз фарҳангҳои гуногун муттаҳид намуда, сулҳ, дӯстӣ ва эҳтиромро байни миллатҳо тарғиб мекунад. Қабули он ҳамчун ҷашни ҷаҳонӣ аз ҷониби Созмони Милали Муттаҳид гувоҳи арзишмандии ин мероси маънавии башарият мебошад.

Наврӯз нигаҳдорандаи рӯҳи бузурги ориёиву эронии мост, ки омаданашро барои ҳама дӯстону фарзонагон фархундабод мегӯям!

Бигзор Наврӯз ба хонадони ҳар яки мо баракат, осоиш, ишқ ва хушбахтӣ эҳдо намояд!